Quyida siz uchun 6 maslahatni bermoqchiman. Ba’zi maslahatlarni Шутикова Анна muallifligidagi maqoladan oldim. Ba’zilarini o’zimdan qo’shdim. Aralashmadan tayyor bo’lgan maslahatlarni sizga taqdim qilmoqchiman.
1. Yodlanishi lozim bo’lgan so’zlarni qog’ozchalarga yozib oling. Qog’ozchaning bir tomonida yangi so’z, ikkinchi tomonida esa so’zning tarjimasi. Ana endi yozib olgan so’zlaringizga o’zingiz bilan olib yurib, transportda, ko’chada yoki ishxonada bo’sh vaqtlarda qarab olishingiz mumkin. Bu uslub orqali anchagina so’zni yodlab olishingiz mumkin.
Zamonaviy axborot texnologiyalarni inobatga olgan holatda planshet yoki sensor telefondan foydalanuvchi do’stlarimiz yangi dasturlardan foydalanishi mumkkin. Dastur orqali ular yodlagan va yodlamagan so’zlarini bilib olishlari mumkin. Masalan Duolingo dasturi aynan siz yodlashingiz lozim bo’lgan so’zlarni sizga taqdim etib keladi.
2. Kuni bilan kompyuter oldida ishlab o’tirasizmi? Yangi so’zlarni o’rgatuvchi dasturlardan birini o’rnating. Dastur sizga yangi so’zni taqdim qilib boradi. Bunday dasturlardan biri Words teacher. O’rnating va bir kunning o’zida vaqti vaqti bilan yangi so’zlarni yodlab boring.
3. Hech tarjimon bo’lgingiz kelganmi? Vatingiz bemalolroqmi? Unda til o’rganish doirasidan tashqariga chiqing va so’zlarni matndan o’rganing. Uncha katta bo’lmagan matn oling va uni tarjima qilishga harakat qilib ko’ring. Lug’atlarda notanish so’zlarni topishga urinib ko’ring va o’sha so’zlarni yodlashga harakat qiling. Bir necha kundan so’ng tarjima qilgan matningizni qayta ko’rib chiqib, yodlagan yangi so’zlaringizni takrorlab, mustahkamlab olishingiz mumkin.
4. Yodlagan so’zlardan gaplar tuzing. Zerikarli gaplarni o’rniga kulguli, qiziqarli gaplar tuzing. O’zingiz bilan bog’liq bo’lgan gaplarni tuzsangiz ham bo’ladi. Masalan yoqtirgan hayvoningiz bilan bog’liq. Yoki do’stingiz haqida qandaydir qiziqarli fakt.
5. Siz uchun qiyin tuyulgan so’zga o’zbek tilida qandaydir shakli o’xshash so’z topishga harakat qiling. Misol uchun: Memory so’ziga memorial yodgorlik.
6. Bilaman, ko’pimizda uchraydigan muammo bu so’z yodlashga ishtiyoqning yo’qligidir. So’z yodlashga vaqt kelganda dangasaligimiz tutib qoladi. Shuning uchun so’zni yodlamasdan uni oddiygina ko’zdan kechirib chiqishimiz ham mumkin. Aytaylik, har kuni 10 tadan so’z yodlashga ahd qildingiz. Ularni 10 martalab takrorlamasdan, kunning ma’lum vaqtlarini belgilab oling va shu vaqtlarda 10 ta yangi so’zni ko’zdan kechirib chiqing. Kun davomida shu yangi so’zlar bilan bog’liq bo’lgan gaplar tuzishga harakat qilishingiz mumkin.