Коронавирусга қарши курашиш штаби аъзоси Нурмат Отабеков:
Касалликнинг ўнинчи кунидан бошлаб беморда Covid-19’га қарши мукаммал иммун тизими шакллана бошлайди. Ўз тасдиғини топган яна бир жиҳат шуки, касалликни оғирроқ бошдан кечирган инсонда шаклланган иммун тизими анча мустаҳкамроқ бўлади.
Дунёда ёппасига ҳаммада Covid-19 қайтадан қайд этилиши тўғрисида бирорта ҳам асосланган илмий маълумот йўқ.
Агар шу касалликнинг мутацияга учраган вируси билан ёки айнан Covid-19 билан узоқ муддатдан кейин яна рўбару келадиган бўлсак ҳам, иммун тизими хотирасида ушбу касалликка қарши антитаначалар ишлаб чиқарилгани ҳақида ахборот мавжуд бўлади.
Ҳатто иккинчи марта Covid-19 қайд этилса ҳам, у жуда енгил кечиши мумкин. Яъни иммун тизими хотирасида антитаначалар ишлаб чиқарилгани ҳақида ахборот борлиги – касалликдан тезда соғайиб кетиш эҳтимолини юзага келтиради.
Аҳоли орасидаги суҳбатлар давомида икки марта Covid-19 билан касалланганини айтаётганларни ҳам учратиб турибмиз. Агар шу каби ҳолатлар лабораторияда Covid-19 вируси борлиги тасдиқланган тақдирда ҳам, биз бунга битта касаллик билан иккинчи марта касалланди, деган фикр билан қарашимиз керак эмас.
Буни шу билан изоҳлаш мумкинки, касаллик юқтириб олган организм ундан тўлиқ тузалиб улгурмаган ёки лаборатория текширувларида тест системалар билан боғлиқ муаммолар бўлган бўлиши мумкин.